Buat interesante lima atu buka-hatene iha eleisaun prezidensiál Timor-Leste tinan 2022

Eleisaun prezidensiál sei hala'o iha Timor-Leste iha 19 Marsu 2022. Ho kampaña eleitorál ne'ebé atu hahú, sei iha ensiazmu boot iha nasaun ne'e. Eleisaun sira-ne'e hanesan eleisaun dahuluk iha nasaun ne'e dezde pandemia COVID-19 hahú, no Timor-Leste hetan impaktu husi inundasaun ida-ne'ebé aat liu iha ninia istória besik tinan ida liubá. Eleisaun ida-ne'e mós koinside ho aniversáriu restaurasaun independénsia ba dala 20.

Karik kandidatu ida la hetan votu liu 50% iha ronde dahuluk iha Marsu, eleisaun tuir mai sei organiza iha Abríl, ne'ebé sei envolve kandidatu rua ho votu barak liu.

Hanesan rezultadu husi sira-nia dezempeñu iha administrasaun eleisaun ne'ebé la’o ho di'ak, livre no justu iha pasadu, Timor-Leste estabelese ona istória ida-ne'ebé di'ak no hatudu sira-nia kompromisu ba eleisaun transparente no inkluzivu. Kontinuasaun  iha diresaun ida-ne'e sei hametin tan konfiansa públiku nian iha prosesu eleitorál no iha servisu Sekretariadu Tékniku ba Administrasaun Eleitorál (STAE) no Komisaun Nasionál Eleisaun (CNE).

Eleisaun ida-ne'e konta ho kandidatu hamutuk sanulu-resin-neen, balun independente no balun iha afiliasaun partidária (númeru boot liu dezde restaurasaun independénsia iha tinan 2002), sira hotu-hotu ho objetivu atu sai Prezidente ba nasaun ne'e durante tinan lima oin mai.

Maske preparasaun eleisaun segura hasoru COVID19 kompletu ona, autoridade eleitorál sira mós hein katak previsaun ba udan no posibilidade ba estragu ba estrada no infraestrutura sira sei la afeta eleitór sira-nia partisipasaun.

Iha elementu adisionál lima ne'ebé sei sai interesante atu obzerva iha eleisaun ida-ne'e:

Eleitór foun– Eleitor joven hamutuk 200,000 ne'ebé rejista ona no sei la'o ba dahuluk ba fatin votasaun iha tinan ida-ne'e, votante mileniál sira sei determina rezultadu iha eleisaun ida-ne'e. Ho joven feto no mane barak mak vota iha tempu ne'e, oinsá mak sira sei hili atu vota? Votante foun sira sei buka atu vota ba kandidatu sira ne'ebé mak bele hatán ba preokupasaun , hanesan edukasaun no empregu? Oinsá média, inklui média sosiál sei influensia votante foun sira ?

Feto sira-nia partisipasaun no lideransa – Eleisaun ne'e iha kandidatu feto barak. Ida ne'e signifika saida  ba avansu iha igualdade jéneru iha Timor-Leste? Votante feto sira sei hili atu vota ba kandidatu feto sira? Kandidatu ida nia jéneru sei afeta votante sira-nia hahalok?

Oinsá afiliasaun partidária sei afeta tendénsia votasaun – Votante sira sei hetan influénsia husi afiliasaun partidária nian? Se karik kandidatu sira ne'ebé partidu nomeia la hetan votu sufisiente iha ronda dahuluk, oinsá partidu sira husu sira nia membru sira vota iha eleisaun tuir mai?

Kandidatu sira-nia esperiénsia sei sai fatór boot ne'ebé influénsia votante sira - Eleitoradu sei hili atu vota ba kandidatu sira ne’ebé iha esperiénsia iha governasaun barak liu ka sira sei hili atu vota ba kandidatu ne'ebé iha posibilidade atu sai kandidatu foun sira, ho esperansa katak sira sei lori ideia no enerjia foun ba Gabinete Prezidénsia nian?

Votasaun Jeográfika - se votante sira husi parte oioin nasaun nian (Norte/Súl/Oeste/Leste) no munisípiu sira seluk iha prioridade ne'ebé diferente no "ezijénsia" husi kandidatu sira? Ka iha elementu ruma ne'ebé votante sira husi fatin hotu-hotu iha nasaun ne'e buka hela iha Prezidente ida?

Ne’e mak elementu lima importante ita bele repara! Elementu importante ida atu enfatiza maka, saida de’it mak sai ona Ita nia pontu de vista, importante maka, se ita iha elejibilidade, ita tenke bá vota! Bainhira ita ezerse ita nia direitu ba votu, importante mós ba ita atu respeita ema seluk nia direitu no pontu de vista seluk. Eleisaun pasífika esensiál ba demokrasia. I, rezultadu finál siada de’it mak mai, klaru tebes katak kandidatu ida ne’ebé de’it mak manán, nia sei iha papél importante ida atu lidera nasaun ida ne’e ba iha faze foun dezenvolvimentu nian.