DISKURSU SEKRETÁRIU-JERÁL ONU IHA PARLAMENTU NASIONAL TIMOR-LESTE

Exelénsia sira,

Sr. Prezidente Repúblika, Señora Prezidente Parlamentu Nasionál, Sr. Deputadu sira, Exelénsia sira.
Ida-ne'e hanesan priviléjiu ida no satisfasaun boot ida atu bele fila fali ba ita-boot nia rain furak ida-ne'e.

Ha’u agradese ba Governu no povu Timor-Leste ba ospitalidade ne’ebé furak tebes.

Kariñu ne’ebé sempre simu ha’u iha Timor-Leste mak resíproku no halo vizita ida-idak sai okaziaun ida ne’ebé labele haluha.

Ha’u mós agradese ba Prezidente Parlamentu Nasionál ba onra ne’ebé nia fó mai ha’u hodi bele dirije ba povu Timoroan ohin liuhosi sira-nia reprezentante eleitu lejítimu sira.

No ha'u labele subar onra espesiál ne'ebé ha'u sente hodi halo ida-ne'e iha momentu ida ne'ebé Parlamentu Nasionál, ba dala uluk, prezide hosi feto ida, ne'ebé ha'u kongratula ba faktu ida-ne'e rasik.

Sr. Presidente, Señora Presidente, Sr. Deputado sira

Ha'u sei la haluha kalan 29 Agostu nian, tinan 25 liubá.

Ha’u iha Lisboa, emosionadu tebes ho notísia Konsulta Populár nian to’o ha’u labele toba.

Ha’u sempre iha telefone, akompaña progresu votasaun nian no aprende kona-ba ema lubun ne’ebé la’o hosi foho mai Dili hodi vota.

Tuirmai ha’u hatene katak povu Timor mobilizadu tomak hodi defende sira-nia autodeterminasaun.

Liu pursentu 98 hosi eleitoradu sira maka mai vota iha loron ne'ebá.

Povu timoroan sira ko'alia no mensajen hosi votu liu 3/4 maka fó ba: independénsia.

Maibé, ksolok ne'ebé ha'u sente iha kalan ne'ebá nakfilak lalais ba horor, durante semana sira ne'ebé maka susar tuirmai.

Ho relatóriu sira ne'ebé to'o mai ha'u no imajen sira violénsia nian iha dalan sira ne'ebé maka taka iha jornál no ekran TV nian.
Ha’u hamutuk ho ema portugés millaun ba millaun iha dalan sira Lisboa nian ne’ebé halo protestu solidariedade ho povu timoroan, hodi ezije atu komunidade internasionál atua.

Ha'u hanoin hikas oinsá ema sira fó liman ba malu, hodi forma iha sidade laran, liu hosi embaixada sira hosi membru permanente sira hosi Konsellu Seguransa ONU nian.

Sidade ne'e nakdoko ho sidadaun lubun ne'ebé hatais mutin.

Dala barak ha'u sai hosi ema-lubun hodi bolu líder mundiál oioin, hodi husu sira atu uza sira nia influénsia hodi prevene masakre ida.

Felizmente, iha tempu ne’ebá, bele nafatin mobiliza komunidade internasionál no pás no seguransa prevalese iha Timor-Leste.

Sr. Prezidente, Señora Prezidente, Sr. Deputadu sira

Ha’u-nia vizita dahuluk mai Timor-Leste iha tinan 2000 nu’udar Primeiru-Ministru Portugál, vizita ne’ebé domina ho emosaun, ksolok no esperansa.

Ha’u fila iha Maiu 2002 iha vizita memorável ida hodi partisipa iha serimónia istóriku Restaurasaun Independénsia nian.

Povu timoroan nia autodeterminasaun sai hanesan prioridade sentrál ba ha’u-nia governu nia polítika esterna no sai, defaktu, hanesan konstante ida ba ha’u-nia rain nia polítika esterna.

Ha’u-nia prezensa iha Timor-Leste, iha momentu ne’ebé nasaun ne’e sai independente, lahó dúvida nu’udar priviléjiu ida ne’ebé boot liu ne’ebé ha’u-nia vida polítika fó mai ha’u.

Loron ne’ebá, no ohin, ha’u sente korajen ne’ebé boot no determinasaun rohan-laek husi povu Timor.

Korajen atu ezije rekoñesimentu ba ita-boot sira nia direitu no liberdade fundamentál sira.

Aten-barani atu halo Lei manán no rejeita lei ida-ne'ebé maka'as liu.

Aten-barani ema barak nian ne’ebé mehi ukun-rasik-an, maibé la moris hodi haree ida-ne’e sai realidade.

Sr. Prezidente, Señora Prezidente, Sr. Deputadu sira

Ita nunka bele haluha rezisténsia timoroan nia korajen.

Husi ema sira ne'ebé riska buat hotu atu haree hetan independénsia.

Husi feto rezisténsia sira ne'ebé lakohi husik sira nia lian sai nonook.

Ita nunka bele haluha sakrifísiu sira ne'ebé halo, moris sira ne'ebé lakon, família sira ne'ebé muda ba nafatin.

Ita labele haluha papél frente armada, frente klandestina, frente diplomátika no Igreja Katólika, hanesan Preámbulu Konstituisaun Repúblika Demokrátika Timor-Leste fó hanoin.

Nune’e ha’u hakarak, ho maneira solene ohin iha ne’e – iha reprezentante eleitu sira povu Timor-Leste nia oin – fó ha’u-nia omenajen kle’an ba rezisténsia timoroan no ba mane sira no
feto sira ne'ebé maka halo parte no kompromete sira-nia an ba ida-ne'e.

Sr. Prezidente, Señora Prezidente, Sr. Deputadu sira

Luta ba independénsia harii parseria ida ne’ebé kle’an entre Nasoins Unidas no Timor-Leste.

Ha’u lembra ho momoos loron, semana no fulan negosiasaun ne’ebé maka’as entre Indonézia no Portugál, iha Nasoins Unidas nia okos, ne’ebé lori ba akordu iha Maiu 1999.

Maski bainhira posibilidade ba akordu parese dook, determinasaun hosi parte rua, no mós hosi mediadór sira Nasoins Unidas nian, maka rezolutu. Ikusmai, determinasaun ida-ne'e fó rezultadu.

Ha'u labele lakon atu destaka no elojia papél ne'ebé maka ha'u nia antesesór, Kofi Annan, no diplomata no ofisiál sira ne'ebé maka akompaña nia hala'o. Nia belun loos ba Timor-Leste ne’ebé ita hotu deve buat barak ba nia.

Tuir akordu iha Maiu 1999, misaun Nasoins Unidas nian iha Timor-Leste, UNAMET, moris.

Feto no mane sira misaun nian hatudu dedikasaun boot no profisionalizmu bainhira sira organiza referendu boot ida iha tempu badak nia laran, maski hetan intimidasaun no ameasa sira.

Hafoin Konsulta Populár, no bainhira violénsia habelar, sira hatudu dala ida tan aten-barani ne'ebé boot tebes no sentidu misaun nian.

Durante ha’u nia vizita ha’u sei fó omenajen ba funsionáriu UNAMET sira ne’ebé lakon sira-nia vida hodi serbí Nasoins Unidas - Timor-oan tomak!

Maibé ha'u lakohi falla, mós iha ne'e iha okaziaun ida-ne'e, atu evoka nia memória.

Permite ha’u, defaktu, atu aproveita oportunidade ida-ne’e hodi elojia dedikasaun husi funsionáriu hotu-hotu Nasoins Unidas nian ne’ebé serbisu iha Timor-Leste durante faze oioin husi Organizasaun nia prezensa iha rai-laran no iha servisu husi Misaun oioin.
Konserteza UNAMET, maibé mós Administrasaun Tranzitória ONU nian iha Timor-Leste (UNTAET), Misaun Apoiu Nasoins Unidas nian iha Timor-Leste (UNMISET), Gabinete ONU nian iha Timor-Leste (UNOTIL), Misaun Integrada Nasoins Unidas nian iha Timor-Leste (UNMIT) no, ohin, ekipa ONU iha Timor-Leste.

Nu’udar Sekretáriu-Jerál, ha’u agradese ba sira hotu ne’ebé serbí ona Nasoins Unidas iha Timor-Leste durante tinan 25 liubá, no ba sira ne’ebé kontinua halo ida-ne’e.

Maibe se Timor-Leste hetan buat barak husi ONU, lia los mak fo mos buat barak ba ONU no ba mundu.

Konversasaun sira ne'ebé media hosi ONU hatudu ba mundu katak bele rezolve konflitu sira iha meza negosiasaun no katak bele konforma realidade tuir Lei Internasionál no ho prinsípiu sira husi Karta Nasoins Unidas nian.

No, oras ne’e daudaun, Timor-Leste evolui ona hosi nasaun uma-na’in ba forsa manutensaun pás nian, ba nasaun ida ne’ebé kontribui pesoál ba misaun manutensaun pás ONU nian iha nasaun sira seluk, nomeadamente iha Sudaun Súl.

Exelénsia sira,

Timor-Leste hatudu katak labele harii buat ida sólidu ka dura ho baze nega ema nia direitu fundamentál.

Ida-ne'e hatudu valór rekonsiliasaun no estabelese relasaun viziñu ne'ebé di'ak.

No katak ho solidariedade internasionál, pás, liberdade no demokrasia bele buras.

Mundu bele aprende buat barak husi Timor-Leste, liu-liu iha tempu ida ne’ebé konflitu sira aumenta barak no tensaun jeopolítika sai aat liu tan.

No iha kontestu ida ne'ebé preokupante disfunsionalidade iha relasaun entre podér sira no impunidade ne'ebé aumenta hasoru violasaun sira ba direitus umanus no lei internasionál.

Exelénsia sira,

Mundu ohin loron hasoru ho erozaun maka'as ida hosi konfiansa.

Progresu sira iha dékada barak kona-ba kiak no hamlaha hetan inversaun.

Objetivu Dezenvolvimentu Sustentável sira iha perigu nia laran.

No kaos klimátiku sai aat liután ho forsa mortál.

Mundu presiza atua iha frente hotu-hotu.

No Timor-Leste bele hatudu dalan iha área xave tolu:

Primeiru, Objetivu sira Dezenvolvimentu Sustentável nian.

Husi hakotu kiak no hamlaha to’o hetan igualdade jéneru.

Timor-Leste nu’udar ezemplu importante kona-ba dezenvolvimentu ne’ebé sentradu iha ema.

‘Labele husik ema ida iha kotuk’ sai nu’udar apelu klaru Timor-Leste nian, bainhira imi diversifika imi-nia ekonomia no investe iha edukasaun, saúde, no seguransa ai-han.

Ita-boot nia adezaun ba membru tomak ASEAN nian bele ajuda estimula dezenvolvimentu ho ritmu ida ne'ebé maka'as liután, orientadu hosi Ajenda Antigua no Barbuda nian ba Estadu Illa Ki'ik sira iha Dezenvolvimentu.

Maibé parseiru internasionál sira mós tenke reforsa sira-nia apoiu.

Iha finansiamentu subsidiadu no fleksivel, transferénsia teknolojia, investimentu foun sira, liuliu iha transformasaun sistema ai-han nian.

Ida-ne'e mós signifika implementa estímulu ODS nian ho kompromisu ida ho montante biliaun $500 iha finansiamentu anuál ba nasaun sira ne'ebé sei dezenvolve hela.

Ida-ne'e signifika reforma arkitetura finanseira globál – atu nune'e bele reprezenta di'ak liután dezenvolvimentu nasaun sira, liu-liu Estadu Illa Ki’ik Dezenvolvimentu no Nasaun Menus Dezenvolvidu hanesan Timor-Leste - no responde ba sira nia nesesidade.

Exelénsia sira,

Segundu — ita presiza asaun kona-ba klima.

Ita-nia planeta moras no sintoma sira maka'as no fatal.

Inundasaun sira.

Rai-maran sira.

Inséndiu ai-laran sira.
 
Nivel tasi ne'ebé sa'e.

No ema biliaun sira hasoru manas maka'as.

Timor-Leste – hanesan ho Estadu illa ki’ik sira seluk – sente hela efeitu sira ne’ebé aat liu, maski halo uitoan de’it hodi hamosu krize ne’e.

Husi aldeia lokál sira to’o mai iha ne’e iha Dili, laiha fatin ida iha illa ne’e ne’ebé povu Timor seguru hosi ameasa mudansa klimátika ne’ebé buras daudaun.

Tinan-tinan, ema timoroan liu tersu ida sofre inundasaun no rai-halai.

Mudansa padraun udan been nian bele iha impaktu maka'as ba produsaun ai-han.

Maski nune’e, Timor-Leste buka atu rezolve krize klimátika.

Ita-boot nia kultura tradisionál lei kostumeiru nian, Tara Bandu, maka harii reziliénsia hosi baze.

Maski nune’e, finansiamentu ne’ebé presiza ba adaptasaun - tantu iha Timor-Leste no iha mundu tomak - boot liu dook osan ne’ebé iha.

Mundu tenke halo reasaun.

Nasaun dezenvolvidu sira tenke duplika finansiamentu adaptasaun nian ba pelumenus biliaun $40 kada tinan to'o 2025 – hanesan promete ona;

No esplika oinsá sira sei prenxe lakuna finansiamentu adaptasaun ne'ebé maka buras daudaun.

Ita mós presiza kontribuisaun signifikativu sira ba Fundu Lakon no Estragus foun;

No esforsu globál ida ne'ebé maka'as tebes atu limita aumentu iha temperatura globál ba grau 1.5 Celsius hodi evita estragu sira iha futuru.

G20 iha responsabilidade no kapasidade atu lidera asaun global hodi asegura limite grau 1.5, mak hanesan:

Nasaun hotu-hotu tenke aprezenta planu nasionál sira kona-ba klima to'o tinan oin. Planu sira-ne'e tenke kobre ekonomia tomak no aliña ho limite grau 1.5.

Ida ne’e hanesan oportunidade ida ba nasaun sira hanesan Timor-Leste atu liga asaun klimátika ho ekonómiku transformasaun no dezenvolvimentu sustentável. 
Sistema Nasoins Unidas nian prontu atu apoia ita-boot liuhosi ami nia inisiativa Promesa Klimátika.

Exelénsia sira, belun doben sira,

Terseiru no ikus: ita presiza medida sira atu revitaliza ita-nia sistema multilaterál ne'ebé la uza ona.

Ita presiza enkuadramentu globál sira bazeia ba planu ida ba aban-bainrua, no la'ós reflesaun ida hosi pasadu.

Simeira ba Futuru iha fulan oin hanesan pasu importante ida ba reforma no restaura konfiansa iha instituisaun no solusaun multilaterál sira.

Hametin mekanizmu prevensaun konflitu no dezarmamentu liuhosi Ajenda Foun ba Pás…

Hafoun fali ita-nia kompromisu ba direitus umanus...

Hasa'e reprezentasaun no lian hosi nasaun sira ne'ebé maka sei dezenvolve hela iha Konsellu Seguransa ONU nian no iha arkitetura finanseira globál...

Adota Paktu Dijitál Globál ida ne'ebé kontribui ba taka lakuna sira iha konetividade no estabelese prinsípiu sira ne'ebé fahe ba futuru dijitál ida ne'ebé nakloke, livre no seguru ba ema hotu...

Reforsa asaun globál atu nune'e Intelijénsia Artifisiál sai oportunidade ida no la'ós risku ida, liuliu ba nasaun sira ne'ebé sei dezenvolve hela...

No dezenvolve Plataforma Emerjénsia ida hodi hadi'a resposta internasionál ba xoke globál sira ne'ebé kompleksu.

Medida globál sira-ne'e hotu depende ba apoiu iha nivel nasionál.

No ita-boot sira, nudár membru parlamentu, mak harii ponte entre ema, komunidade no governu sira.

Ami konta ho ita-boot sira atu artikula diskusaun globál sira ho prioridade nasionál sira, hodi ajuda kumpre promesa Simeira nian.

La'ós de'it ba polítiku sira. Ema hotu-hotu iha partisipasaun iha rezultadu Simeira nian.

Ha’u haksolok tebes bainhira hatene katak joven sira husi Timor-Leste, ho apoiu husi ONU, iha ona organiza no halibur iha ámbitu Simeira Futuru nian, aprezenta proposta sira ba mudansa no medida konkreta sira.

Mudansa presiza momentum. No ida-ne'e maka momentum ne'ebé ita presiza.

Exelénsia sira, Deputadu sira, Belun sira,

Mundu iha buat barak atu aprende husi Timor-Leste.

Hodi hatudu kbiit hosi multilateralizmu, diplomasia no esperansa iha futuru ida ne'ebé di'ak liu, ita-boot inspira ona mundu.

Nasoins Unidas sente onradu atu sai ita-boot nia parseiru konstante iha faze hotu-hotu hosi viajen ida-ne'e.

No ami sei nunka para atu apoia ita-boot sira hodi harii futuru ida ne'ebé prósperu liután.

Obrigado barak.