Diskursu Koordenadór Rezidente ONU nian a.i. iha Loron ONU Plantasaun Mangrove

Onra boot ida ba ha’u atu hamutuk ho ita-boot sira ohin hodi selebra Loron ONU nian 2024.

Loron ida-ne'e la'ós de'it atu reflete kona-ba atinjimentu pasadu sira hosi Nasoins Unidas, maibé atu renova ita-nia kompromisu ba futuru—ida ne'ebé ezije asaun imediata ba mudansa klimátika, protesaun ba ema vulneravel sira, no lideransa hosi joven sira.

Eventu kuda ai-parapa ohin nian la’os buat simbóliku leet ida de’it; maibe ida ida-ne'e hanesan deklarasaun ida kona-ba ami nia rezolusaun atu hasoru dezafiu boot ida iha mundu dadaun ne’e.

Liuhusi kuda ai-parapa oan liu 300 ne’e, ita kuda hela esperansa, reziliénsia, no futuru ida ne’ebé sustentável ba Timor-Leste.

Mudansa klimátika afeta tiha ona nasaun furak ida-ne'e.

Nível tasi ne'ebé sa'e, udan-been ne'ebé la tuir tempu, manas, no rai-maran ne'ebé ita esperiénsia iha fulan rua ikus ne'e la'ós ona ameasa sira ne'ebé dook; eventu meteorolójiku estremu sira-ne'e afeta daudaun komunidade sira.

Painél Intergovernamentál kona-ba Mudansa Klimátika (IPCC) alerta katak nível tasi nian iha rejiaun ida-ne'e bele sa'e liu metru ida iha sékulu nia rohan, perspetiva ida ne'ebé preokupante ba nasaun ida ne'ebé 85% hosi populasaun hela iha rai-tetuk no área tasi-ibun sira.

Se ita la halo investimentu boot sira atu proteje tasi-ibun no muda infraestrutura sira, konsekuénsia sira bele sai aat liutan.

Mudansa klimátika halo problema sosio-ekonómiku, komunidade rurál no urbana sira sira nia moris sai vulnerável and aat liután no hasa'e kustu dezenvolvimentu nian.

Mudansa sira iha udan-been, temperatura tasi nian ne'ebé sa'e, no padraun tempu ne'ebé ladún di'ak ameasa seguransa ai-han, kualidade bee, no moris ema millaun resin nian.

Tanba ida-ne'e maka asaun klimátika sai hanesan sentru hosi ajenda globál Nasoins Unidas nian.

Sekretáriu-Jerál ONU nian, António Guterres, subliña beibeik, "Funu ba futuru sustentável sei manán ka lakon iha dékada ida-ne'e."

Desizaun ne’ebé ita halo ohin loron sei determina future jerasaun tuirmai nian.

Ai-parapa mós sai parte krusiál ida hosi solusaun.

Sira sai hanesan barreira natureza nian hasoru erozaun tasi-ibun no anin-boot.

Ekosistema sira-ne'e absorve karbonu barak liu duké ai-laran barak no fornese habitat sira ne'ebé importante ba moris tasi nian.

Iha Timor-Leste, sira krítiku la’ós de’it ba ambiente maibé ba komunidade sira ne’ebé depende ba tasi hodi hetan ai-han no sustenta moris..  

Maibé kuda ai-horis mesak sei la rezolve problema.

Mudansa loloos presiza asaun koletiva no envolvimentu hosi setór hotu-hotu sosiedade nian.

No tanba ne’e mak eventu ohin nian, ne’ebé lidera husi juventude Timor-Leste ne’e importante tebes.

Nasoens Unidas fiar iha joven sira nia kbiit.

ONU haree ita-boot sira hanesan parseiru hodi harii mundu ida ne'ebé justu, ekuitativu, no sustentável

Alumni Parlamentu Foinsa’e Timor-Leste no inisiativa sira seluk ne’ebé lidera husi foin-sa’e sira mak ezemplu primeiru kona-ba oinsá foin-sa’e sira kaer knaar, hasa’e konxiénsia, no mobiliza komunidade sira.

Ita-boot sira maka lori naroman hodi leno dalan ba atinji Objetivu sira Dezenvolvimentu Sustentável nian,

Ohin, hanesan ita selebra Loron ONU nian 2024, mai ita hanoin katak Nasoins Unidas harii iha prinsípiu dame, kooperasaun, no asaun koletiva nian.

Durante tinan 79, ONU serbisu atu haburas dame, proteje direitus umanus, no promove dezenvolvimentu iha mundu tomak.

Iha Timor-Leste, ONU komprometidu atu fó apoiu ba governu no povu hodi hametin reziliénsia, hadi’a seguransa ai-han, no proteje meiu-ambiente.

Maibe ONU labele halo buat hirak ne’e mesak

Ita presiza envolvimentu hosi sosiedade sivíl, parseiru dezenvolvimentu sira, no, importante liu, foin-sa'e sira hosi nasaun ida-ne'e.

Risku sira aas, maibe foku ohin loron nian maka asaun.

Ai-parapa sira ne'ebé ita kuda ohin loron sei proteje tasi-ibun sira, prezerva biodiversidade, no sai hanesan fatin ba karbonu nian iha luta hasoru akesimentu globál.

Ba foin-sa’e sira ne’ebé organiza ona eventu ohin nian, ha’u hato’o ha’u-nia obrigadu wain

Ita-boot sira fó esperansa mai ami ba futuru ne'ebé nabilan liu, no Nasoins Unidas sente onradu atu apoia ita-boot sira.

Mai ita hasoru mudansa klimátika ho foti oin.

Hamutuk, ita bele kria futuru ida ne'ebé sustentável ne'ebé fó benefísiu ba jerasaun sira tuir mai

Obrigadu barak!